Buletin

Buletini i FSFE-së - tetor 2016

Fjalë nga redaktorët tuaj

Pas disa ndryshimesh në programin e praktikantëve të FSFE-së në fillim të shtatorit, jemi të gëzuar të njofotjmë një vend për praktikant teknik pranë FSFE-së. Kërkojmë një praktikant që mund të punojë me ne për tre muaj në zyrën tonë në Berlin, duke mësuar rreth Software-it të Lirë dhe FSFE-së, teksa në të njëjtën kohë jep ndihmesë në rishkrimin e një pjese të infrastrukturës tonë teknike.

Në muajt e ardhshëm, do të njoftojmë më tepër raste praktikantësh dhe një mënyrë e mirë për t’i mësuar është të lexohet rregullisht ky buletin. Mos harroni të shihni më poshtë ndarjen tonë mbi hedhjen në veprim, për disa lajme mbi ulje çmimesh për artikuj tregtarë dhe material informativ (do të donim t’ju dërgonim edhe më, nëse ju janë mbaruar!).

Kuvendi

Akoma s’e kemi marrë veten nga gëzimi që na dha takimi me shumë nga bashkësia jonë në Kuvendin e FSFE-së, në shtator. Qe një përvojë e këndshme dhe jemi të prirë ta përsëritim. Një nga pikat kulmore qe fjala e mbylljes, kur Julia Reda e quajti software-in pronësor si një kërcënim për demokracinë. Mos harroni ta shihni fjalën dhe disa biseda të tjera prej Kuvendit, ose te kanali ynë YouTube, ose prej shërbyesit tonë të shkarkimeve, prej nga videot e gatshme mund t’i merrni në formatin webm.

Pesëmbëdhjetëvjetorin e FSFE-së e kremtuam edhe në C-Base, me një ceremoni ku nderuam mjaft nga herojtë tanë vendorë anembanë Europës. C-Base ka dhënë me zemërgjerësi një regjistrim të ceremonisë, nëse jeni të interesuar të dëgjoni historinë e disa prej heronjve tanë, të cilët sot i gjeni duke punuar brenda një prej ekipeve të FSFE-së.

Jeni praktikanti ynë teknik i ardhshëm?

Si e përmendëm, po kërkojmë një praktikant teknik që të bëhet pjesë e ekipit tonë për tre muaj, dhe të marrë pjesë në rishkrimin dhe sendërtimin e një sistemi të ri administrimi llogarish. Kjo praktikë zhvillohet në Berlin, duke filluar më 1 janar 2017 ose si mund të bihet dakord ndryshe. Përkundrejt një rroge të vogël, hollësitë mbi të cilën mund t’i lexoni tok me informacione të tjera te lajmërimi ynë për praktikant teknik. Presim të shohim aplikimin tuaj!

Nga bashkësia

• David Boddie përshkroi përshtypjet që pati nga eksplorimi i sistemeve operativë alternativë dhe, veçanërisht, Inferno-s.

• Michał ‘mina86’ Nazarewicz ofroi një dorë marifetesh dhe ndihmëzash Python të dobishme.

• Jonas Öberg shkroi në blog mbi pasje kodi, ose kontribut me kod dhe paraqiti ndryshimet te programi i FSFE-së për praktikat. Regjistrohuni te buletini ynë, nëse s’e keni bërë ende, që të mund të merrni lajmet më të reja rreth krejt vendeve të hapura për praktikantë FSFE-je!

• Elena "e Valhallasë" shpjegon dallimet mes pranimit të karameleve nga të panjohur dhe përdorimit të programeve falas nga burime ç’të jetë.

• Polina Malaja shkroi në blog mbi sfidat e reformës së Të drejtave të Kopjimit në BE.

• Florian Snow ndau me ne kujtimet e tij nga 3 ditët e Kuvendit të FSFE-së në Berlin, brenda dhe jashtë BCC-së.

Lajme të tjera

Matthew Garrett, anëtar i këshillit të FSF-së, shkroi një artikull ku i mëshohet nevojës për kontroll të plotë nga përdoruesi i pajisjeve të lidhura në Internet, duke përvijuar kështu disa praktika të nevojshme për IoT-in.

Ç’kemi bërë tjetër?

• Polina Malaja, analistja e politikave dhe bashkërenduese ligjore e FSFE-së, tok me këshilltarin ligjor të FSFE-së, Carlo Piana, morën pjesë në një praktikë mbi ndërveprimet mes Software-it të Lirë dhe standardizimit, organizuar nga Instituti Europian i Standardeve të Telekomunikacionit (ETSI) në Sophia-Antipolis, Francë. Gjatë praktikës, ata u morën me nxitjen për adoptim licencash të forta copyleft dhe për zgjidhjen e disa nga tensionet rreth patentave.

• Si vazhdim të praktikës së të qenit i pranishëm në veprimtari të organizuara nga bashkësi të tjera, FSFE-ja qe e pranishme me një stendë informative në Rotlintstraßenfest, Frankfurt mbi Main. Një falënderim të fortë për grupin e Anëtarësisë Shok të Rinit/Mainit që e bëri të mundur këtë!

Hidhuni në veprim!

• Tani vonë kemi grumbulluar, sistemuar dhe gatitur për shitje e ca mbetjeve nga artikujt tregtarë që kemi patur nëpër vite, dhe i kemi ofruar për shitje në internet këto artikuj. Për shumicën e gjërave më të vjetra, kemi vetëm pak stok, ndaj ky është rasti juaj të porositni disa artikuj tregtarë vintage FSFE me ulje çmimi (shihni për numrat e kuq!)
• Nëse po zënë e ju mbarohen materialet informative rreth software-it të lirë, tani mund të jetë çast i përshtatshëm të merrni ca më tepër. Porositni ngjitës, afishe dhe fletë-palosje nga faqja jonë e materialeve promocionale dhe do t’jua dërgojmë sa më shpejt të jetë e mundur, që të na ndihmoni t’i përhapim në kompaninë tuaj, shkollën, bibliotekën vendore, në veprimtari, ose kudo gjetkë që ju duket se njerëzit do të duhej të dinin rreth software-it të lirë.
• Nëse s’jeni ende një anëtar shok i FSFE-së, do të duhej të shihnit mundësinë të bëheni. Puna jonë s’do të qe e mundur pa kontributin e anëtarëve shok dhe vullnetarëve tanë!

FSFE-ja në Shtyp

• [DE] nga Patrick Beuth, Zeit Online, HP-ja saboton klientët e vet
• [DE] nga Stefan Krempl, Heise, Kuvendi i Software-it të Lirë: Fushatë për "Software Publik" në Administrata Publike

Falënderime për krejt vullnetarët, anëtarët shok dhe korporatat dhuruese që bëjnë të mundur punën tonë,

Redaktorët tuaj, Jonas Öberg dhe Olga Gkotsopoulou FSFE